Paplajahan 4: Wenten Salah Tampi ring Para Kramane
Para Utusan 6:1-7
Tandina, para utusan Sang Hyang Yesus makarya paindikan sane ngangobin ring Kota Yerusalem. Irika ipun ngancan seleg midartayang Orti Rahayune ring anake akeh, yadiastun ipun katambakin olih para pemimpin anak Yahudine.
4
Ritatkala punika, ngancan ngakehang para pengiring Sang Hyang Yesuse. Nanging soroh anak Yahudine sane mabasa Yunani, ambul-ambul kapining soroh anak Yahudi sane mabasa Ibrani. Krana para janda sane mabasa Yunani punika nenten karunguang nganggen bea idup sadina-dina. 2 Punika mawinan makaroras utusan munduhang makasami pengiring Sang Hyang Yesuse sane wenten ring Yerusalem. Irika raris para utusane punika mabaos sapuniki, “Nenten patut titiang sami ngalain tugas midartayang pengajahan saking Sang Hyang Pengardi krana ngurusin kaperluan sadina-dina para jandane. 3 Becik yening para semeton milih papitu anak lanang sane dharma lan sane kaebekin olih Roh Sang Hyang Pengardi, turmaning wicaksana. Ipun sane jagi ngurusin indik ajengan, 4 mangdane titiang lan para utusan sane lianan prasida mabakti lan midartayang pengajahan kamanten.”5 Raris makasami pengiring Sang Hyang Yesuse punika nerima baos para utusane. Irika raris ipun sami milih Stepanus, inggih punika anak sane pracaya pisan ring Sang Hyang Pengardi saha kaebekin Roh Idane. Tur ipun sami milih Pilipus, Prokorus, Nikanor, Timon sareng Parmenas. Kenten pada, ipun milih Nikolaus saking Kota Antiokia sane sareng magama Yahudi. 6 Makapitu anake punika kabakta ring arepan para utusan, raris utusane punika nunas icayang ring Sang Hyang Pengardi antuk ngenahang tangannyane ring anake makapitu punika mangda nglaksanayang ayah-ayahane kapining para jandane.
7 Sekadi punika pengajahan saking Sang Hyang Pengardi ngancan kasub tur para pengiring Sang Hyang Yesuse ring Yerusalem ngancan ngakehang. Lan akeh pada para rsine sane pracaya ring Sang Hyang Yesus.
Matius 18:15-20
Duk idumun tatkala Sang Hyang Yesus kari meneng ring jagate, Ida nyegerin anak sane karangsukin buta kala. Sasampun paindikane punika, Ida ngajahin para sisian Idane indik welas asih kapining sasama.
15 Raris Hyang Yesus malih ngandika sapuniki, “Yening ada semeton ragane madosa, kemu ja orahin dosan-dosanne. Raosang ja unduke ento ajak dadua dogen. Yening ia nyak ningehang tutur ragane, semeton ragane buin dadi dame ajak ragane. 16 Nanging yening ia tusing nyak ningehang tutur ragane, ajak ja saksi abesik wiadin dadua. Krana manut ukum agama Yahudine, ‘Sapatutne ada dadua wiadin tatelu saksi apanga paundukane ento mabukti saja.’ 17 Nanging yening ia tusing nyak ningehang pitutur ragane, orahang ja paundukane ento sid para krama ane pracaya teken Tiang. Tur yening pamuputne ia tusing masih nyak ningehang tutur para kramane ento, anggep ja ia buka anak tukang nuduk jinah pajega lan anak ane tusing nawang Sang Hyang Pengardi.
18 “Raos Tiange ene saja! Sujatine sekancan paundukan ane tembahang ragane di gumine ene, masih katembahang di swarga. Tur sekancan paundukan ane orahang ragane dadi kalaksanayang di gumine ene, dadi masih kalaksanayang di swarga. 19 Tur buin Tiang ngraosang ane saja! Yening ada anak ajak dadua uli anake ane pracaya di gumine ene pada adung mapinunas, pinunasne ento bakal kicen olih Sang Hyang Aji, Pengardin ragane ring swarga. 20 Krana yening ada dadua wiadin tatelu anak ane mapunduh krana ngiring Tiang, Tiang ada ditu bareng-bareng ajak anake ento.”
Penuntun mabligbagan ring pasamuan
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii. “Sekadi napike sapatutne iraga nyalanang idup manut pengajahane puniki?"
iv. “Kapining sirake sapatutne iraga nyeritayang malih ceritane puniki?”